Neste concurso ofertáronse 598 destinos e participaron 440 aspirantes, dos que o 86,36% conseguiron destino definitivo
O Diario Oficial de Galicia (DOG) publica na súa edición de hoxe a resolución do 14 de maio de 2018 da Dirección Xeral de Recursos Humanos do Sergas, pola que se resolve, con carácter definitivo, o concurso de traslados de persoal licenciado sanitario de atención hospitalaria (persoal facultativo especialista de área, médico de urxencias hospitalarias, médico de admisión e documentación clínica) e médico asistencial do 061, correspondente a 2017. Na devandita resolución tamén se publica a apertura dos prazos de cesamento no centro de orixe e toma de posesión do destino adxudicado. A este concurso de traslados presentáronse un total de 440 aspirantes de 44 categorías de persoal licenciado sanitario. O 86,36% dos participantes, é dicir 380 profesionais, conseguiron destino definitivo.
Neste proceso ofertáronse un total de 598 destinos, ademais daqueles postos en resultas que quedaron vacantes cando o profesional que os viña ocupando obtivo destino neste mesmo concurso de traslados. Das 47 categorías ofertadas, 44 corresponden a persoal facultativo especialista de área e as outras tres restantes a persoal médico asistencial do 061, persoal médico de urxencias hospitalarias e persoal médico de admisión e documentación clínica. Non se rexistrou ningunha solicitude de cambio de destino nas especialidades de Inmunoloxía, Xeriatría e Cirurxía Cardiovascular.
Os profesionais que acadaron un destino definitivo nesta convocatoria de traslados de persoal licenciado sanitario cesarán no seu actual posto o vindeiro 28 de maio. A resolución da que se fai eco o DOG de hoxe tamén contempla o cronograma da toma de posesión do destino adxudicado, sendo o 31 de maio para aqueles profesionais que acadaron un destino definitivo na mesma área; o 18 de xuño para aqueles con destino nunha área distinta a actual e o 28 de xuño para os profesionais que acadaron un novo destino adxudicado neste concurso de traslados e proceden doutro servizo de saúde.
Movemento dos adxudicatariosAs categorías que rexistraron unha maior participación foron a de persoal facultativo especialista en Medicina Interna, con 30 participantes, seguida da de persoal médico de urxencias hospitalarias (29) e facultativo especialista en radiodiagnóstico, con 27 participantes.
A área sanitaria con maior demanda é a da Coruña seguida das áreas de Santiago e Pontevedra-Salnés.
Dos participantes no concurso destaca, entre outros datos que o 60,79% dos adxudicatarios son mulleres fronte ao 39,21% de homes. Segundo a idade, o 77,89% dos adxudicatarios pertence ao tramo de idade comprendido entre os 40 e 55 anos, fronte ao 12,11% menores de 40 anos e o 10% maiores de 55 anos.
Outros datos salientables son que do total das adxudicacións efectuadas, 32 corresponden a profesionais cuxo centro de orixe radicaba noutra comunidade autónoma. O 22% dos adxudicatarios procedentes de fóra do Servizo Galego de Saúde xa se atopaba en comisión de servizo no Sergas e ao 87% dos 380 profesionais que obtiveron un novo posto asignóuselles o primeiro destino solicitado.
Na páxina web do Servizo Galego de Saúde (www.sergas.es) están publicadas as listas coas puntuacións e, de ser o caso, os destinos definitivos asignados en cada unha das categorías/especialidades convocadas, a disposición das persoas interesadas. Ademais, o estado de cada solicitude tamén pode ser consultado pola persoa concursante no seu expediente electrónico persoal en Fides/expedient-e/sección de procesos.
- Te recomendamos -
