O conselleiro mantivo un encontro co alcalde no que se avaliaron os avances en novas reestruturacións parcelarias para ampliar a superficie agraria útil
O conselleiro do Medio Rural, José González, avaliou co alcalde de Outeiro de Rei, José Pardo, as posibilidades de mobilizar novos terreos do concello a través dos novos procesos de reestruturacións parcelarias. En concreto, a petición dos propios veciños, os técnicos de Medio Rural analizaron a situación en Sobrada, Paza, Arcos e Aguiar, as catro parroquias das que se recibiron as correspondentes sinaturas adaptadas á nova lei este mesmo ano.
Unha vez avanzados os primeiros estudios previos, que aínda están sendo analizados polo departamento correspondente, parece que habería posibilidades de iniciar reorganizacións do terreo e incrementar así a superficie agraria útil do municipio, e así llo trasladou José Gonzalez ao rexedor. O conselleiro explicou que poñer a producir predios abandonados é unha das prioridades desta consellería, polo que se mostrou aberto a estudar todas aquelas iniciativas que vaian nesta liña. Pola súa banda, o alcalde ofreceu toda a súa colaboración e a do concello, en xeral, para axudar no proceso de concentración.
A día de hoxe, o concello de Outeiro de Rei non ten ningunha reestruturación aberta, pero si dúas parcelarias rematadas, a de Castelo e Parada, que reorganizaron 555 hectáreas de terreo de 359 propietarios.
Mellores servizos sociaisRespecto aos investimentos de Medio Rural no municipio, cómpre destacar tamén a ampliación da escola infantil municipal que se leva a cabo grazas a unha axuda superior aos 180.000 euros do plan Leader e coa que se financiará o 90% dos custes da actuación. Esta reforma permitirá aumentar en 15 prazas a capacidade do centro, que ata o de agora contaba con tres aulas.
- Te recomendamos -
