Concedéuselles preto de 468.000 euros a través da orde de axudas a entidades 2018-2020 para a organización de novas accións formativas e melloras na casa de acollida
O director xeral de Inclusión Social, Arturo Parrado, destacou esta mañá, durante un acto de entrega de diplomas, a importante tarefa que realizan organizacións de índole social como os Irmáns Misioneiros dos Enfermos Pobres en favor das persoas e familias con menos recursos. Arturo Parrado, que estivo acompañado do delegado territorial da Xunta, Ignacio López-Chaves, felicitou ás persoas que completaron as accións formativas desenvolvidas por esta entidade, que contaron co financiamento da Consellería de Política Social e que tiveron por obxecto mellorar a empregabilidade do alumnado dos mesmos.
Na súa intervención, o director xeral garantiu a continuidade do apoio da Xunta ao traballo contra as desigualdades que desenvolven os Irmáns Misioneiros dos Enfermos Pobres. De feito, a través da orde de axudas de inclusión para o período 2018-2020, esta entidade recibirá preto de 468.000 euros para a programación de novos cursos de alfabetización dixital e adquisición de competencias clave, e para actuacións de mellora e mantemento da casa de acollida que ten en funcionamento.
Arturo Parrado enmarcou esta liña de axudas a entidades, cofinanciada polo Fondo Social Europeo e o Fondo Europeo de Desenvolvemento Rexional, no traballo do Goberno galego na procura da igualdade de oportunidades e na loita contra a pobreza. Ao respecto, indicou que a pesar de que a cifra de persoas en situación de carencia material severa se reduciu un 40% no último ano, a Xunta seguirá coa súa aposta polo traballo conxunto coas entidades sociais e co resto das administracións co obxectivo de que as políticas sociais sexan verdadeiramente eficaces e cheguen aos fogares que máis as precisan.
Nesta liña, o director xeral sinalou que o fondo compromiso social do Executivo autonómico se plasma en feitos como o incremento nun 3% do orzamento destinado en 2019 a políticas activas de inclusión, ata chegar aos 119 millóns de euros. Esta contía supón un 70% máis do que a Xunta destinaba a este fin hai nove anos.
Visita á Federación Veciñal Eduardo ChaoArturo Parrado tamén visitou na cidade olívica a Federación Veciñal Eduardo Chao. Esta entidade está a desenvolver un curso formativo de deseño e confección que se imparte a mulleres desempregadas e vítimas de violencia de xénero co obxectivo de mellorar a súa empregabilidade.
Así mesmo, neste local veciñal ten lugar outro curso para obter o expediente de esforzo de integración que esixe a lei.
- Te recomendamos -
