Les xornaes técniques van axuntar a partir de mañana a representantes d’Holanda, Lituania, Polonia, Francia, Italia, Bélxica, Portugal, España y la Comisión Europea
Les xornaes técniques qu’entama la Federación Europea de los Caminos de Santiago van axuntar n’Asturies a partir de mañana a delegaciones d’Holanda, Lituania, Polonia, Francia, Italia, Bélxica, Portugal y España, nun programa que va desenvolvese n’Uviéu, Villaviciosa y Xixón hasta’l xueves viniente. L’alcuentru va cuntar tamién con representantes de les alministraciones de Galicia y el Principáu y de la Comisión Europea. El programa va abrise n’Uviéu con una sesión técnica y va incluyir tamién una xunta del proyectu Creative Loci Iacobi. Los participantes van caltener un alcuentru con representantes de delles entidaes venceyaes col Camín de Santiago n’Asturies, nel que van tar presentes tamién el conseyeru d’Educación y Cultura, Genaro Alonso, y la secretaria del Conseyu Xacobéu, Grial Ibáñez. Amás, les delegaciones van visitar mañana la catedral d’Uviéu y la Cámara Santa, y el miércoles van facer el tramu del Camín de Santiago entre Priesca y Sebrayu, en Villaviciosa, onde van conocer, amás, San Salvador de Priesca y el monesteriu de Valdediós. Darréu, van visitar Llaboral Ciudá de la Cultura, en Xixón. Asturies pertenez a la Federación Europea de los Caminos de Santiago dende mayu del 2017. Esti organismu xestiona les rutes xacobees y informa al Institutu Européu d’Itinerarios Culturales, institución dependiente del Conseyu d’Europa y na que tamién ta integráu’l Principáu dende setiembre del añu pasáu.
- Te recomendamos -
