Galicia foi a primeira rexión europea en asinar esta declaración hai un ano no marco do seminario `Brexit: por que ameaza o sustento das comunidades pesqueiras de toda Europa´, celebrado en Santiago
Desde que Galicia asinou a declaración de apoio ás comunidades pesqueiras ante o brexit hai un ano, un total de 66 rexións europeas con marcado carácter pesqueiro adheríronse a este acordo. A comunidade autónoma galega, a través do presidente Alberto Núñez Feijóo, foi a primeira en facelo no marco dunha xornada celebrada en Santiago o 23 de outubro do ano pasado e organizada pola Alianza Pesquera Europea (EUFA) e a Xunta para analizar os riscos do brexit na pesca.
Esta declaración conxunta defende a importancia da pesca e insta a que esta actividade sexa unha prioridade nas negociacións do brexit co obxectivo de que non sexa utilizada como moeda de cambio. O documento é froito da colaboración entre rexións e sector e ten como obxectivo xuntar aliados de distintos estados membros na defensa de intereses comúns.
De feito, esta declaración de Santiago foi asinada nun acto no que participaron representantes do sector pesqueiro galego e representantes políticos de Alemaña, Bélxica, Dinamarca, Francia, Irlanda, Países Baixos, Polonia, Suecia e España. Unha xuntanza para defender ante a Unión Europea por un posicionamento que minimice as posibles consecuencias negativas do brexit no sector pesqueiro.
A esta declaración de Santiago, súmase a declaración asinada en Cardiff no mes de novembro do ano pasado na Conferencia de Rexións Periféricas Marítimas. Este documento recolle o posicionamento e as reivindicacións destas rexións ante o brexit. Neste encontro, no que tamén participou o presidente da Xunta, avaliouse ademais o impacto que terá nas comunidades da Europa periférica e marítima, como Galicia, a saída do Reino Unido da Unión Europea.
A participación de Galicia nestas declaracións de apoio é unha mostra máis do papel activo que está a ter a nivel europeo á hora de defender os seus intereses durante as negociacións entre a Unión Europea e o Reino Unido e ante o novo escenario que se abrirá cando estas rematen. De feito, a comunidade autónoma galega converteuse na primeira rexión europea en trazar unha folla de ruta. Un exemplo deste traballo tamén son os dous informes que encargou a Xunta para avaliar as consecuencias sociais e económicas do brexit para a pesca galega.
- Te recomendamos -
