Desde o Goberno galego non se entende que David Regades vexa a iniciativa, creada a prol do tecido produtivo da área de Vigo, allea ao desenvolvemento económico
Ante as declaracións do delegado do Consorcio Zona Franca de Vigo (CZFV), David Regades, publicadas hoxe, sobre a non colaboración desta entidade no proxecto do primeiro Campus de FP de España, a Xunta quere manifestar en primeiro lugar a súa sorpresa, xa que non recibira ningunha notificación ao respecto.
O único contacto realizado ata o momento por David Regades coa Consellería de Educación foi unha resposta ambigua a unha solicitude de reunión realizada polo anterior titular, Román Rodríguez, na que precisamente demandaba abordar esta cuestión.
Na misiva, o conselleiro insistía en que o proxecto Campus FP Vigo abrangue “un conxunto de actuacións estratéxicas que buscan impulsar unha educación de vangarda e altamente integrada no tecido produtivo”. Sinalaba ademais que a iniciativa contribuirá a “impulsar a FP dual, incrementará a colaboración con empresas da comarca e a transferencia de coñecemento, ao tempo que apostará pola innovación e o emprendemento”.
Desde o Goberno galego non se entende, polo tanto, que David Regades apunte que esta “excelente idea”, como el mesmo recoñece, sexa allea ás competencias de desenvolvemento económico que ten a Zona Franca.
Con respecto á inexistencia dun expediente aberto na Zona Franca, a Xunta quere manifestar que ao longo do primeiro semestre deste ano se mantiveron reunións con representantes de Zona Franca e existen numerosos correos electrónicos nos que se remitiron diferentes borradores de convenio. No último deles, datado en xuño, exprésanse con claridade as obrigas das administracións financiadoras que, tal e como recollen os medios de comunicación, prevían un investimento de 7,1 millóns por parte da Xunta e de 5,5 por parte do Consorcio de Zona Franca.
A Xunta quere salientar tamén o seu pesar pola falta de vontade de colaboración do actual responsable do CZFV ante un proxecto pioneiro en España, que precisa da implicación de todas as administracións. Cómpre sinalar que a perda do financiamento que estaba previsto por parte da Zona Franca pon en risco unha iniciativa creada para o tecido produtivo da área de Vigo e atendendo ás demandas do seu empresariado.
- Te recomendamos -
