Disputaranse as modalidades de fondo infantil, BTT, gymkana, cadete feminino, cadete masculino, contrarreloxo individual e contrarreloxo por equipos
A secretaria xeral para o Deporte, Marta Míguez, participou na mañá de hoxe na presentación do Campionato de España Escolar de Ciclismo 2018 Infantil e Cadete que terá lugar en Baños de Molgas do 6 ao 8 de xullo. A titular da carteira de Deporte destacou este campionato polo seu carácter “igualitario e inclusivo” facendo referencia á modalidade adaptada na que poden participar cegos e deficientes visuais, así como deportistas con parálise cerebral e discapacidade física.
Durante o acto que tivo lugar na Delegación Territorial da Xunta en Ourense, a responsable do Deporte galego tamén subliñou a capacidade organizativa que ten Galicia para os eventos deportivos e valorou a importancia de que un campionato de España se celebre en Galicia. Asemade destacou como, neste campionato xúntanse dúas áreas de especial relevancia para a Secretaría Xeral para o Deporte como son o ciclismo e a actividade física orientada as idades máis temperás.
Nas súas verbas, a secretaria xeral referiuse á importancia que ten para a comarca macedá o ciclismo, especialmente o ciclismo de montaña, que conta con grandes representantes como son Pablo Rodríguez Guede ou Ivan Feijoo, nomes que alentan aos demais rapaces a formar a gran canteira ciclista de Galicia.
Dentro do Campionato de España Escolar de Ciclismo 2018 disputaranse as modalidades de fondo infantil, BTT, gymkana, cadete feminino, cadete masculino, contrarreloxo individual e contrarreloxo por equipos.
- Te recomendamos -
