Técnicos da Administración hidráulica de Galicia analizarán a viabilidade de utilizar sistemas de depuración autónomos e independentes nas zonas máis illadas do municipio en lugar de conectalos á rede xeral de colectores
Augas de Galicia e o Concello de Tomiño traballarán de forma conxunta na promoción de sistemas de saneamento locais nos núcleos máis illados do rural como unha solución alternativa e máis económica á súa conexión á rede de colectores do río Louro. Así o acordaron o director de Augas de Galicia, Roberto Rodríguez, e a alcaldesa de Tomiño, Sandra González, durante unha reunión para falar da situación do saneamento no rural do concello pontevedrés.
Técnicos da Administración hidráulica de Galicia xa asesoraran con anterioridade ao Concello de Tomiño neste sentido, trasladándolle ao Goberno local os distintos condicionantes técnicos existentes á hora de deseñar sistemas de depuración para pequenas poboacións.
Nesta ocasión, a Xunta ofrécese tamén a prestar a colaboración técnica necesaria para analizar a viabilidade de utilizar un sistema illado no núcleo concreto de Currás e seleccionar o tipo de tecnoloxía máis axeitado tendo en conta as características do lugar. O obxectivo é verificar se nestas zonas pode ser máis rendible recorrer a sistemas de saneamento e depuración independentes en lugar de conectalas á rede de colectores, o que adoita ser a solución máis habitual.
A iniciativa permitirá á súa vez á Administración Hidráulica de Galicia seguir acumulando experiencia no eido dos sistemas autónomos de saneamento para pequenos núcleos de poboación, un tipo de solución que podería reproducirse noutros puntos do rural galego.
- Te recomendamos -
