O delegado territorial, José Manuel Balseiro, explicou que a Consellería de Economía, Emprego e Industria investiu 140.000 euros nesta iniciativa
A Consellería de Economía, Emprego e Industria entregou hoxe os diplomas aos quince mozos e mozas que se formaron no obradoiro de emprego Doc-Tic de Ribadeo.
O delegado territorial da Xunta en Lugo, José Manuel Balseiro, participou no acto de clausura desta actividade, na que a Xunta investiu preto de 140.200 euros e que serviu para ofrecer aos participantes formación teórica e práctica nas especialidades de Produción fotográfica (8 alumnos) e Operacións de gravación e tratamento de datos e documentos (7 alumnos).
Balseiro destacou que este é un dos catro obradoiros Yei que se desenvolveron nos últimos meses na provincia de Lugo, especificamente dirixidos a menores de 30 anos, e explicou que os participantes reciben un certificado de profesionalidade con validez en todo o Estado.
Os obradoiros son programas mixtos de formación e emprego, que por un lado favorecen a adquisición de experiencia laboral a través dun contrato de traballo e por outro desenvolven obras ou servizos de interese xeral e social.
No caso de Ribadeo, o proxecto centrouse na dixitalización e tratamento de fondos documentais, continuando co labor que xa realizaron outros obradoiros financiados pola Xunta no municipio en anteriores convocatorias. En concreto, os alumnos traballaron na dixitalización das actas capitulares do Concello de Ribadeo expedidas entre os séculos XVIII e XIX.
Ao mesmo tempo, aprenderon e aplicaron técnicas arquivísticas de xestión de documentos, descrición, catalogación, inventario, clasificación ou instalación, traballando coas actas de sesións e outros documentos procedentes do fondo do concello.
Dada a orientación do obradoiro, os participantes quixeron celebrar tamén hoxe o Día Internacional dos Arquivos, que se conmemorará o vindeiro 9 de xuño, cunha exposición do traballo realizado neste ámbito durante os seis meses dedicados ao proxecto.
Nova convocatoriaAta o vindeiro 25 de xuño está aberto o prazo para presentar as solicitudes ao abeiro da nova convocatoria de axudas dos obradoiros duais de emprego e dos específicos para menores de 30 anos, dous programas que se porán en marcha no mes de setembro e cos que a Xunta prevé incrementar as oportunidades laborais de máis de 2.350 persoas desempregadas en Galicia.
Poden optar a estas axudas, ao igual que outros anos, as administracións locais (con prioridade os Concellos Emprendedores), asociacións de entidades locais e mancomunidades e, no caso dos duais, tamén, como novidade este ano, as entidades sen ánimo de lucro do ámbito forestal constituídas e rexistradas como asociacións.
Os obradoiros duais combinarán un contrato de formación e aprendizaxe durante 9 meses e a contratación en prácticas de, como mínimo, tres meses máis nunha empresa emprazada no ámbito territorial onde teña lugar o obradoiro, e sempre que o traballo estea vinculado coas materias que se impartan no programa. Darase prioridade aos obradoiros forestais e aos vinculados ao Camiño de Santiago.
Pola súa banda, os obradoiros de emprego dirixidos especificamente á mocidade tamén ampliarán a duración de seis a nove meses.
- Te recomendamos -
